陰跌市最影響哪一種散戶？

昨晚登入IB戶口，竟見資産總額少了數千元。小妹嘅開户資金好細，喺冇買賣交易丶portfolio無大變動的情況下，一夜內蒸發幾千蚊是不可能的。懷著不安的心情入睡後，第二朝起身睇番IB，卻已回復正常了。印象中IB亂報價丶搞錯資産數據的情形，已非第一次發生。風兄的朋友也有類似經歷，未知大家的IB戶口，曾否發生過問題呢？

經歷近月恒指的陰跌市，2018初的全民炒股風氣，早已蕩然無存。穩步上揚的美股，彷彿成了不少人的「最後一根稻草」。買開正股的散戶，都未必敢向”每次下試一千點”的恆指入手。與其買”今日低價丶明天高價”的港股，倒不如向長升長有的美國科網股下手吧。

吊詭的是，市旺時一些橫掃港股的價值投資者，在跌市時就冇咗影，亦不見他們有分段入貨的策略。一個調整市(唔係真•熊市)，就篩走了一堆假值投資人士。唔知金融海嘯來襲時，可以篩走幾多全職財演開班奴呢？

對大多數返緊全職的人嚟講，市升市跌，主動收入仍是不變。但今年的恒指陰跌市，就真係令某類散户瞓唔着了——我指的是靠百多萬至2百零萬元港股收息丶過早榮休唔撈的散戶。

-----------------------------------------------------------

相信你我身邊，都有這些人：他們收入不高， 但支出極低，冇乜dependents，搞掂住屋(多是和親人共住，或有政府資助房屋)。於是，當他們儲夠一百多萬至二百萬總值的港股時，便憧憬靠年息5-6厘的藍籌股，過每月取八至九千元被動收入的生活。畢竟平時返工，日子都過得咁慳；依家唔做嘢唔駛出街，消費應該更少了吧！

但他們忽視了陰跌調整市，對個人心理的影響。總值二百萬港元的股票，在下調三成後，便只有一百四十萬。大多數的勉強財自者，其實心裏也知道自己的NAV，是受不了大震蕩的。雖說派息率在股價下跌時會被迫提高，但全年的收息總額，始終要打個折扣。當他們計到下年的收息，將由十萬跌至九萬多，然後再下滑至八萬幾千元的時候，便會「忍唔住做嘢」。

為求保本，他們會在陰跌市惡化前，先賣走部分股票以套取現金。但手頭上的股票減少，即代表全年的收息更少。於是，當事人便只能「退而求其次」：把現金停泊在利息低的定期戶口；或downgrade一下生活質素，每月只花六至七千元吧。

可恨的是，調整市的內臨，頂多只對股票丶貨幣匯率等有較大影響，但衣食住行等的開支，卻不見得有減少(因並非經濟衰退，商戶不見得有壓力去調低產品價格)。身家減值丶股票又跌價，對每年只收十萬元(或以下)股息的散戶來說，每次消費都彷彿如履薄冰。病咗唔敢花幾百蚊去睇醫生，撞正管理費每年加價時，亦只能在心裏暗地咒罵。

(我也是這些”心裏暗地咒罵”的其中一分子呢)

當然，「過早財自」的人，可暗地裏炒散丶做兼職丶接freelance，甚至返番full-time工也可。但這是出於「工作熱誠」，還是對NAV減值的隱憂，便只有當事人最清楚了。

-----------------------------------------------------------

如是未夠實力提早退休的散戶，就會好似我咁：一見到IB戶口少咗幾千蚊，便嚇到面青口唇白。大家身邊，又有冇哋靠mil幾兩mil成功財自的親友？相信大家的分享，能啟發我狹窄的思維呢:)