財務大師之英雄内戰

自從六月尾的"pillow talk"後，大師A及大師B首辦的幼兒理財班，賺到盤滿缽滿。兩位大師食髓知味，現在大師B又想再加開advanced班。大師A為表友好，便親自撰文宣傳。

在文中，大師A討論報advanced班的讀者，走的是一條寂寞的投資之路。畢竟，當每個人都為了慳錢，只肯花數十至過百元買本膚淺工具書的時候，你竟然耗資四位數字在滿佈精髓的PowerPoint上? 大家都會笑你是傻子的。

大師A的一番好意，竟惹來大堆好事之徒留言批評。大師A應接不暇之餘，表面上仍盡力維持風度。惟大師B早已氣得火冒三丈，又不滿大師A打小人不力，給予敵人更多的空間去攻擊自己。

財務大師們今次又要開會，但火藥味濃厚。Blog界的正義聯盟，本應上下一心對付班evil bloggers的，但現在卻面臨分裂的危機。

B(煩燥):  我開advanced班的計劃，多得你唔少啦!
A(錯愕):  你話我篇文?我花咗好多心機寫㗎!嗰日我一放工，就沖翻屋企開電腦。我寧願擱置自己的讀者來信，都要幫你度好份宣傳稿。
B:  你年資比我少、blog齡又比我淺，邊有咁多讀者好覆?
A(面露不悦):  你也太小覷我了吧? 自從搞過一次公開研討會，我班粉絲的電郵就如雪花般飛過來。單係回應他們的問答，已夠我寫到過千萬hit rate啦!

A(繼續發炮):  為咗谷你呢個班，我仲突登讓個幾好既讀者case，幫你做開場白。但你連句thank you都冇?
B:  你呢哋咪好心做壞事囉! 寫信俾你既讀者，一般都係比較初階的投資者。但我今次開advanced班，係"advanced"啊! 你拋哋beginner case出黎，會令人誤會我前言不對後語的!
A(面色一沉):  你咁講係咩意思? 即係指你班讀者，比我嗰哋更高質素? 你唔好忘記，如非我blog以高hit rate為你導航，you are nobody!
B:  Hey, 你又唔係native speaker，竟然用英文串我? 你雞腸咁好，又唔見你用英文窒番班串我既bloggers?

A:  我同各大傳媒、報章一直合作開，所以我嗰blog要維持良好的形象，點可以為咗你一個而破戒鬧人㗎?
B(怒髮衝冠):  傳媒報章?! 乜成名對你黎講，真係咁重要咩? 我夠有專業資格咯，都未好似你咁串! 好呀，既然你覺得名利比我呢個friend更重要，咁我哋割蓆吧!
A(被辣㷫):  你真係横蠻無理! 其實我都忍咗你好耐了，成日以大佬身份自居。割蓆嘛，割咪割囉! 怕你呀~

B:  哼，一朝得志! 同你鬥，我從未驚過。我大把allies，除咗一班同行外，仲有多屆既學生做我後盾呢。

A(刷新自己的blog page):  講allies，我又點會少過你? 香港同海外都有呀!l
B:  你睇清楚哋啦，呢班所謂blog友，有幾多係同你真正熟的?上次死都唔肯向我道歉嗰位，佢寧願走去溝女都唔幫你啦。
A: 我同佢哋熟唔熟，你又知幾多? 我成日請大家食飯、維持友好關係㗎~

二人繼續七嘴八舌地吵架，英雄内戰正式啟幕。

--------------------------------------------------------------------------------

以上故事純屬虛構，只為博大家一笑=) 如有任何感想，歡迎在此留言呢。