不能財自的“藉口”: 小孩/寵物

我一直有追看海外博客的網誌, 他們對技資理財, 都有個人的見解。但間中, 也會看到一些較離奇的觀點。例如:

“Select an appropriate pet – Things like fish, rodents and birds cost a lot less than cats and dogs.”

更甚者, 我早前見過一名英國blogger這樣説: 盡量不要養小孩/動物, 把省下的錢作複式投資, 你會更快賺取財務自由。

生活的各種選擇, 都與金錢有關係。但你總不會以金錢, 來衡量所有人事的價值吧? 你的父母不生育你, 財務擔子肯定會輕很多。但你希望父母為了“極速財自”, 而令自己冇機會出世嗎?

而且, 不少人混淆了“慳”與“賺”的概念。舉例説, 我决定不買游艇, 頂多只能説是慳了一筆虛擬的錢, 但不能説我“賺”了六至七位的數字; 同理, 對沒有小孩/寵物的人來說, 他們是省了錢, 但卻不是“賺”到複式運作的錢。

-----------------------------------------------------------

近期見各位blog友分享親子生活。雖然我冇兒冇女, 但既然家中有兩隻貓咪, 今次就扮一次“車厘媽媽”(嘔!)講下温情嘢吧。

人地英國佬“遇上街貓Bob”, 而我就“遇上港囡貓”, 所以大家的命運亦迴異。Bob仔的主人出書又拍戲(財自咗?), 而我, 就梗係繼續捱啦......

其實我的大貓非常乖巧懂事, 曳既主要係細貓。今次就介紹下佢幾咁“港女”:

每晚定時定候, 佢都要R罐頭食(主糧就永遠剩底幾粒)。如果你唔俾佢, 佢就棟起嗰pat pat, 一路阻住你睇電視, 直到你屈服為止。

近期天氣凍了, 貓咪都喜歡找暖處休息。大貓(右)剛找到電腦後發熱的位置, 細貓(左)便即刻狗衝埋去。佢夾硬黏住大貓, 難怪被怒睥了!

為了清楚細貓的港女傾向, 我安排咗個終極測試: show珠寶。果然, 她一見到有哋bling bling嘢, 就立即擰轉身、東張西望撰好貨!

 

我一關掉珠寶網頁, 佢就9秒9仆咗去瞓。佢既潛台詞係: 工作賺錢, 是你們大人的事, 本小姐只負責分賊贓(大舊嗰份)。

-----------------------------------------------------------

雖然細貓有點老奉、貪心和港女, 但在我心目中, 她及大貓的地位, 都是獨一無二的。

正如父母們對孩子, 也會視之為無價寶。即使上天説可重新造一個更完美的孩子, 他們亦不會以現時的兒女作交換。

當然, 我相信有些人是討厭動物/小孩的。然而, 假如你是真心喜歡這兩者(或其一), 但卻純粹為了省錢, 而放棄自己所求。那麼, 我就只能為你感到惋惜了。

大家對孩子/寵物有甚麼看法? 如你有特別的經歷及感受, 歡迎在此分享一下呢:)