2016年5月21日 星期六

淺談中學同學班聚(全女班)

70後兄近期的文章提到,男士們讀中學時的成績優秀,對吸引女仔大有幫助。那麼女仔讀中學時成績好,對認識異性又有幫助嗎? 

小妹個人認為: 幾乎是沒有的。當然,成績及校園排名好,在社交圈子内,是更容易認識一些所謂名校的男學生。但歸根究底,女士們表面的吸引力,還是樣貌>身材>性格。成績,咩黎㗎?


小妹前幾天搭巴士時瞓着咗,唔知自己水樽漏水,跟住隔離有位青年人拍我膞頭提醒我。之後佢就一路搭訕,當佢講到自己等放榜,而我已畢業,佢就好錯愕咁問: "乜你唔係中學生咩?" 

相反,回溯至中學時代,即使我一年有二百幾日都着住校服,都從來沒有人搭訕問我讀邊間中學。可能我當年嗰樣實在是太薯了=)

同樣地,當年的女校同學們,以前是鬥成績; 現在,即使大家沒有明爭,但還是有地方可以暗鬥的,例如衣著、職業、伴侶等。

小妹最熟的朋友,都不是中、大學的同學。所以中學同學的聯誼會,我去的次數不多,最近的一次,便是2015年8月。

大家都已工作了一段時間,而舊同學又多在金融會計等行業工作,所以她們都是身光頸靚的(我當然是最頹的一個,嘿嘿),名牌手袋、full-set妝容、珠寶配飾等隨眼可見。

大家的交談頗為友善。雖然彼此會八卦下工作環境和感情狀況,但不會直接問薪金、資產等敏感話題。畢竟,女士們言行較為含蓄有禮,在餐桌上,一般都不會直接串人或觸犯別人的庭線的。

之後,戲肉來了。席間有數名女同學將會結婚,然後大家便起哄,問她們打算在哪裏擺酒、去邊度honeymoon、和老公邊度買樓住等。熱烈的程度,真係有少少似查家宅咁。

身為配角的小妹,很少主動發言,但和旁邊同學的互動還是有的。其間,我提到自己養了寵物,要定期打理居住的地方。隔離的女同學便問我: "這是你新租既單位?" 其實我從來没試過租樓,可能,同學們大都認為買樓一定好過租樓吧。而我個樣又咁霉,所以不像是搞掂自住的人呢(笑)。

回答同學時,我模糊混過去便算了。老實說,我自己住得開心便可以,真的不用透露太多資料。另外,又有幾位同學在2015年置業或買樓花,都算是遇上樓市高位。而我單位既資料,只要再說多一點,恐怕便會即刻俾人打! 所以,我選擇了沉默是金。

我樂意見到大家都過着寫意的生活,所以彼此的分享,也是點到即止便可。太多的資訊,反而又會激起女士們暗藏的妒忌心。我亦有不少短處,自問也不希望被別人吊難呢!

這次的聚會十分愉快。可惜,我自從換手機後,WhatsApp入面既groups就冇哂,包括中學同學那一組。看來,我再收到中同reunion的邀請機會,是微乎其微了~

大家有去過難忘的中/小/大學同學聚會嗎?歡迎在此分享一下呢=)

51 則留言:

  1. 其實你打成篇野,重點都係想突出第三段而已=.=

    回覆刪除
    回覆
    1. Hey Sue, 我真係冇呢個意思/_\ sorry下次寫文會過渡得好哋~

      對於一個冇用過名牌化粧/護膚品的女士來說,有人估細自己N咁多年,都算係開心事嚟既=)

      刪除
  2. Cherry姐, 乜你唔係中學生咩?

    回覆刪除
    回覆
    1. 呵呵塘人兄語帶相關? =)
      心智上可能係中學生,可惜年齡早已不是了:(

      刪除
  3. 感覺上, 女人同女人間既關係比較complicated, 有時工作同事, 可以係大家完全不明所以既情況下, 突然二人反晒面, 完全係估佢唔到.

    男人同男人間既關係直接好多, 冇咁多暗鬥, 大家唔妥大家, 當然會大家公開互插.

    回覆刪除
    回覆
    1. 謝謝Joseph兄的留言!認同女士之間的互動是頗微妙的,很多frenemies的存在,即既友好但同時存在比較的關係。

      男士唔妥對方係會不客氣地互插,但有時都會識英雄重英雄。反之,女士們突然反面時,是可以毫無先兆的。

      刪除
  4. 哈哈。第三段太假,重做。
    家下女中學生邊係咁樣語氣講野架,聽兩句就知係唔係啦。

    回覆刪除
    回覆
    1. 池兄,此乃真人真事/_\ 浪費了一名大好青年人生寶貴的十幾分鐘,我都覺得有哋内疚呢=P

      其實時下女學生講嘢的語氣係點樣既呢?池兄不妨分享下:)

      刪除
    2. 數月前,搭巴士,隔離果排有個師奶落車,佢個袋唔知乜嘢漏水,之前擺袋個座位濕咗一灘。跟住有幾個學生妹上車,其中一個就要坐落灘水度。因動了惻隱之心,喝住佢「唔好坐,下面濕架。」點知佢完全唔理照坐可也,仲寸返轉頭,「見到阿叔你靚仔丫嘛,人地下面咪濕囉。」
      佢班同學仔仲要跟住一齊叫好起哄,所有反映同財演大師及其追隨者一樣,將一切善意的提醒都視為反對甚至敵對意見...

      刪除
    3. 哈哈池兄咁都抽到水,果然係文化界的大師=) 前面有個水窪自己照踩落去,真係神仙都救唔番啦!

      話時話,那個漏水的師奶(即係我)是始作俑者喎。我今晚要面壁思過先,嘻嘻=)

      刪除
    4. 一般打工仔看見強積金回報差劣便會大罵基金經理「冇用」之餘還收費昂貴,而奇怪地信徒們卻犯賤地堅持「無限補時」,試想想,如果強積金的基金經理跟你說「只是市場先生的試驗」,要堅持補時,你會有甚麼反應?我想每位信徒應該要好好做一個excel spreadsheet,算一算自己的NAV回報,大師有料定冇料在最簡單的回報率計算下必會無所遁形。話說大師的第一課有教人算回報率嗎?還是用「不要太在意市場先生」和「愈跌愈抵買」的甜言蜜語避過回報率的檢視呢?

      刪除
    5. Wanderer弟思維清晰,值得一讚!

      我估mpf一般冇得自己撰,所以香港人對mpf經理的態度較反感。但是,"財務大師"是自己親自挑選的偶像,自然要多加維護吧!

      我尊重不同人士的財務取向,但過多"當年今日"的翻炒題目...sorry真係唔係我杯茶了。

      刪除
    6. 好的好的。你不煩我也煩了,哈哈!:P不如專注在提升自己的學識上,自己的人生自己負責,別人的事也管不了這麼多了。

      刪除
    7. 呵呵Wanderer弟説得對呢!你咁後生,又大把前途,思考計劃應是前瞻性的。而"當年今日"系列,較似年長之人緬懷過往的光景,又點會啱你呢=)

      同意自己的人生要自己負責,十年後的你,一定會感激番你今日的付出的。大家共勉之!

      刪除
    8. 哈哈哈,池兄抽得好。

      刪除
    9. 哈哈Michael兄下次都要幫手抽番一份=)

      刪除
  5. 中學生Cherry姐XD

    我中學班聚是去了幾次便沒再去了,因為聊及話談離不開「八八掛掛」,我沒興趣聽和聊這些話題,每次都在一旁悶坐,又覺這樣有點浪費時間,但是如果自己帶書到一旁閱讀又不太禮貌,所以之後即使有邀請還是能推便推了。

    回覆刪除
    回覆
    1. 呵呵,Wanderer弟是真正的年青學生,我也就不班門弄斧了=)

      你應是喜歡智慧型的分享,而不慣八卦噪雜的聚會,所以不太喜歡中學班聚,也是很正常的。如果我係你,假如中學是男校,re-U便不用再去; 但中學是男女校的話,就一定要去! 一來睇下以前既女神keep唔keep到,二來昅下以前哋肥妹仔同學,依家有冇人已變咗潛力股:P

      刪除
  6. 流星的中學同學大多於過去這一兩年生兒育女,於是最近中同聚會不論男女談的都是「湊仔經」,流星開始跟Wanderer兄一樣,每次只落得在一旁悶坐了。

    回覆刪除
    回覆
    1. 謝謝流星兄留言!通常生了兒女的舊同學,就會成日喺FB度post哋BB相,分享是好事,但過多的分享便令人"審美疲勞"了。

      下次同學會時,你show下自己嗰blog俾大家睇,包保即刻做主角,大家掛住講你,都唔記得自己個B了=)

      刪除
  7. 哈哈... "比較"在香港很普遍, 最重要是自己過得開心!

    回覆刪除
    回覆
    1. 謝謝80後兄的留言!同意過多的比較、show off,反而會令人更失落。其實簡約主義的生活,也可以過得很快樂,一切都是看人心而已=)

      刪除
    2. 對呢80兄,大家共勉之:)

      刪除
  8. 其實 男人聚會都係一樣,
    鍾意八卦,小弟成日被問感情問題,
    心諗 關你地乜事0者?

    回覆刪除
    回覆
    1. Scott兄的分享真搞笑!可能你係同學堆中最靚仔嗰個,所以大家都對你的感情狀況特別關心吧=)

      刪除
    2. 靚仔一定冇我份,
      下文都有提及我對此等問題的應對

      親友的好意
      http://scottieng0001.blogspot.hk/2015/08/blog-post_24.html

      刪除
    3. 哈哈我以前有睇過你呢篇文呀 ~ 其實好似幅圖咁,霸氣地彈番句"wfc", 班親友以後一定唔敢再咁八卦=P

      刪除
  9. Why do your classmates think having a mortgage must be better than renting?

    回覆刪除
    回覆
    1. 謝謝Keith兄留言!我估女士一般較喜歡安全感吧,所以很多人會認定供樓一定好過租樓。

      我敢講,很多原本不想置業的男士,都係忍唔住老婆大人日哦夜哦,所以才被迫上車的=)

      刪除
  10. 哈哈,一直童顏可以開心暗爽好多年!我老虎而家仲比人當佢係剛畢業員工仔。
    另外,唔同年紀女哂唔同命,哂緊工作,咁仲係好後生0者。

    回覆刪除
    回覆
    1. 謝謝70後兄留言!"一直童顏可以開心暗爽好多年!"~呵呵女士們應該很同意這一句,我亦相信十年之後的中女同學會,大家會係鬥邊個stay young勁哋=P

      可能女校出身既人都係有哋feminism,所以好多人都睇重工作能力+收入。我嗰班暫時真係冇乜人打算做ft housewife(除了一位嫁到國外的同學外)。

      刪除
  11. 作者已經移除這則留言。

    回覆刪除
  12. 原來我都寫過老虎中同聚會,賣下廣告先。
    http://hk70s.blogspot.hk/2015/07/blog-post_27.html?m=1

    回覆刪除
    回覆
    1. 哈哈,70後兄呢篇文好好睇。你囡囡真係好靚好得意:D

      我的中同會,暫時都冇人攜眷出席~可能大家溝嗰件都唔算靚仔吧呵呵!但當然,如果有人的另一半係韓星咁既樣,包保次次re-U都會拎出黎揚下囉=)

      刪除
  13. 「隔離的女同學便問我: "這是你新租既單位?" 其實我從來没試過租樓,可能,同學們大都認為買樓一定好過租樓吧...回答同學時,我模糊混過去便算了。老實說,我自己住得開心便可以,真的不用透露太多資料。」

    這段頗有同感。小弟當年上車時,甚麼人都沒有透露,連父母都不知。後來收到差餉單被母親發現,便說幫朋友買自住當夾份投資胡混過去。後來買自住,也沒有跟朋友講,以免當中有人自卑會疏遠我。後來因結婚太多人問才被迫公開了。

    回覆刪除
    回覆
    1. 謝謝R兄的留言!你的經歷比我更深刻呢。自己付出的努力,人家未必知道;但只要自己一失敗,便可以即刻被唱通街。

      其實我的住處冇乜特別,只是相對同伴們的置業年份(2015),我的入市期及樓價,講出來可能會令人家有hard feeling,所以我才不想多言。

      我唔知你的同學光景如何~但我嗰班太多高收入金融人士,所以要自卑嗰個係我呢=P

      刪除
    2. 講出來真係無乜好處, 人冇你有, 難免有人有hard feeling; 人有你有, 又變人比人比死人。講跌ge, 你心裡唔舒服, 口裡又唔服。到你買左一段時間, 升左大家起哄屈你請食飯; 跌左d衰人急不及待串你。

      收入如何影響不大。如果對方收入同你比以倍數計, 應該不會太在意你資產如何, 可以講; 如果收入差不多, 無論你幾時買, 總有一方hard feeling, 絕不可講; 如果收入低你一截, 更加比你屈機, 佢只會心諗沒有最屈只有更屈, 講黎都哂氣!

      刪除
    3. 哈哈R兄你都好明白女士既比較心理喎~其實在同學聚會中,有哋topic真係講乜都死!無論自己好哋定衰哋,始終都冇完滿的結局,那倒不如保持緘默吧。

      相比起同學們,我的收入不高,但可能因為我從來都不是太信任office的主管們~好的老闆,都仍比不上好的個人資產。收入比不上別人,也不用灰心,保持正面態度及多在投資功夫上努力,也可追回失地吧=)

      刪除
  14. 成篇文重點, 作者個樣靚女好後生, 自己有層樓好疊水, 完。

    回覆刪除
    回覆
    1. 狗股兄你誤會啦,我絕無此意呢/_\ 文中我都有串番自己㗎,如中學時冇人吼、收入低過同學們etc。而且我又不是獨立一人搞掂自住,其實值得驕傲既野係零。

      咁當然,做人都應不亢不卑嘅。假如人家主動串自己的話,唔通自己唔show番少少籌碼出黎咩~?

      刪除
    2. 呵呵Lisa呢一句啱聽=) 好似Lisa咁多美貌多智慧多金銀多粉絲多兒女多孫子,叻女自然唔怕認啦!(之不過會招至"大師"的信徒們妒忌而已)

      我也想實話實說,但我以前學生時代既性格好黑人憎,所以冇乜quota再讚自己,否則便會眾叛親離的了=)

      刪除
    3. “好似Lisa咁多美貌多智慧多金銀多粉絲多兒女多孫子,叻女自然唔怕認啦!(之不過會招至"大師"的信徒們妒忌而已)”

      講得好

      刪除
    4. 狗股兄of course la ~ 常留惡言挑剔人家的,通常都係出於某程度的妒忌之心=)

      刪除
  15. 外表確是容易吸引眼光,無論讀書還是職場,漂亮的女性還是英俊的男性都較有優勢。

    有文章說要向銀行借錢,穿著得光鮮,較有機會得到更高的貸款!(好似off topic,請見諒)

    回覆刪除
    回覆
    1. 太子兄所言有理!外表亮麗的人,第一眼便容易給別人好的印象。但凡事相助亦有相剋,太靚的男士/女士,而又不懂收斂的,會惹來同性的排斥。

      著老西去銀行申請貸款,應該更大着數。我家人之前想轉樓按,試過幾間銀行先有staff認真理會佢,可能同佢成日著過時的三角骨褲有關=)

      刪除
  16. 森而年紀大,外表又唔似中學生,舊男同學多數係粗人,而且幾十歲人仲鍾意低B互串,唔啱傾,女同學變晒C9,都唔啱傾,所以連續幾次聚會都唔去,近年個FB page都冇人留言!

    回覆刪除
    回覆
    1. 謝謝森而兄的分享!其實外表老成持重,會給人踏實的印象。相反,外表太童顏的,在office内易給同性排斥。

      "女同學變哂C9"~可能她們都忙於照顧小孩?其實我好羡慕兼顧到職業及孩子的女士。我本人未有小朋友,但僅是工作+執屋,就已經花掉大部份時間!所以我也好奇在職媽媽究竟點樣balance的。

      "近年個FB page都冇人留言"~呵呵不要緊吧,你的blog留言已夠多啦=)

      刪除
  17. 以自已的方式走自己的路,愛比較的人不見得快樂,人生道路沒有Model Answer :)

    回覆刪除
    回覆
    1. 謝謝Michael兄的留言!同意人生路並没有model answer, 每個人的得著及啟會都是不一樣的,只要唔好浪費時間/機會便可=)

      Michael兄近期成功上車,你都要預咗下次的同學會,大家會不停八卦問你問題呢)

      刪除