十皮都唔駛嘅MBA課程

近日我的親人報讀野雞大學的MBA課程，學費為數萬元港幣，約半年內讀完。其實，在學位量化寬鬆下的社會，愈來愈多的MBA/EMBA課程，只係為開而開，兼俾人為讀而讀。所以，全中文版的課程丶甚至是無考試(只需做projects)的形式，已趨常見。呢類俾$就買到的證書，我稱之為“MK化的MBA課程”。

我親人第一次上堂，已感受到MK的氣息。有些同學的衣著是比較潮，髪尾又乾又開叉(這是經常染髮的後遺症)。和分組的同學吃飯時，我親人也聽到不少較特別的職業，如freelance會計師丶美容院合伙人丶收數公司老闆等。其中收數佬嗰位，更上過蘋果動新聞，他把自己的受訪片段發給所有同學觀看。

課程剛開始，上堂內容圍繞公司融資丶股權收益丶企業上市等範疇。即使是“野雞”證書，都唔代表嗰導師會hea教。只要你有心學，點都會有些得著。尤其是：在我們身邊，未必每個人都有明顯的學術才華。但儘管一個人讀書唔叻，都唔代表佢唔想進修。這些“MK化的MBA課程”，正好切合市場的這個缺口。

你可能會問：「咁嘅MBA，讀出嚟都冇認受性，咁點解仲要讀？」理由好簡單：(一)呢類課程易入易出，基本上你full attendance就可拎到張cert;(二)有哋人真心只想用錢買張沙紙。就如上述提到的美容院/收數公司波士，佢哋都係想畢業後，掛番自己張燙金cert喺公司牆上面啫。佢哋本身做咗咁耐生意，唔通仲expect喺學店學到最重要嘅嘢？

-----------------------------------------------------------

早前看到一名金融KOL，在其FB page這樣自嘲：自己的配偶名校出身丶住開中西區，但婚後卻隨自己搬咗去元天屯。雖然佢只是講笑，但我有時都會覺得：一個blue blood出身嘅人，論靈活性丶處事柔靭度等，有時真係比不上哋MK仔MK女。

背景及學歷中上的人，最容易被哋無謂的ego限住。尤其在成為專業人士後，佢哋會覺得自己一定要住某些區域丶仔女將來一定要上某哋學校etc。一定一定一定......生活不能有妥協丶人生也不能有隨序漸進。

近日大眾留意多咗的E-kids Tommy仔，雖然佢算係no stake in education(會考1分)，但人到中年，佢都搞掂哂四仔主義，真心撈得好過唔少同齡人。

當然，MK出身的人，成功及摸索的道路，一開頭往往是比較崎嶇。但我覺得他們有自身的優勢，也不用太妄自菲薄。例如他們性格較外向丶容易認識新朋友，初入行不如嘗試要跑數的sales類工作，付出多收入也多。再者，他們多擅長打扮丶異性緣也不俗，那麼職業導向便可更具針對性，美容業丶健身室等強調外觀的行業，很可能係佢哋杯茶。青少年時期MK下唔緊要，只要不學壞丶再加上持續進修，他們說不定能發掘人生的其他機會呢。

其實，我絕對認同教育的重要性，尤其自己都算係受惠者。但做咗咁多年人，也應該知道street smart好過book smart。你撈得掂，冇人會再care你嘅出身；反之，你就算強調自己係X大出身丶講到四十幾歲，都冇人會show你。

-----------------------------------------------------------

“用錢買學歷”，大家又有什麼看法？不妨留言分享意見:)